President Bola Tinubu don condemn di killing of military personnel for Delta State, tok say di pipo wey do am, wey im describe as “cowardly”, must face punishment.

Di military pipo wey die include one commanding officer, two majors, one captain, and twelve soldiers plus one civilian, dem die for Okuama community of Ughelli South Local Government Area of Delta State last week during one rescue mission.

As Tinubu react to di tori, for one message wey im send on Sunday evening, im talk say di killing na “unprovoked” and “dreadful”, and im extend im sympathy to di families of di soldiers wey die.

Tinubu still talk say di military high command don already dey respond to di matter, and im promise say di pipo wey do di crime no go escape punishment. Im still talk say Defence Headquarters and Chief of Defence Staff don get “full authority to bring to justice anybody wey dem find say dey responsible for di crime”.