President Tinubu announce dis one for nationwide broadcast yesterday evening. E talk say di decision follow di serious political kasala wey don scatter governance and security for Rivers State. E also mention say security wahala, including militant threat and pipeline vandalism, na part of wetin make am take dis step.

Based on Supreme Court ruling wey talk say di state no get beta government, President Tinubu don suspend Governor Siminalayi Fubara, him deputy, and all di elected members of di Rivers State House of Assembly for six months. E come appoint retired Vice Admiral Ibokette Ibas as di Administrator wey go run di affairs of di state for now.

Our correspondent, Raliat Adenekan, report say di President still assure say judiciary go still dey work as normal, and dem no go make any new law, except for di necessary regulations wey di Federal Executive Council approve.

President Tinubu add say dem don gazette di declaration and send am go National Assembly for ratification. E hope say dis intervention go help bring back peace, order, and better governance for Rivers State.

READ MORE RECENT NEWS HERE https://naija102.com/nigeria-inflation-don-drop-to-23-18-for-february-2025/