Germany government don sack dia cybersecurity chief after report come out say e be like say the man dey do paddy paddy with Russian intelligence.

On Tuesday, one interior ministry tok-tok person say dem don sack Arne Schoenbohm as president of the Federal Office for Information Security with immediate effect.

Different tori been report last week say Schoenbohm fit to get contact with pipo wey get hand with Russian security service through the Cyber Security Council of Germany.

The group dey gada experts from public institutions and the private sector, and Schoenbohm even follow for pipo wey discover the group for 2012.

Media reports say one of dia members na German company wey get branch of Russian cybersecurity firm wey one former KGB employee follow form.