President Bola Ahmed Tinubu don comot from Abuja go Europe, where e go spend three weeks for vacation as part of im annual leave.
According to wetin Bayo Onanuga, wey be Special Adviser to di President on Information and Strategy, tok on Sunday, na London for United Kingdom be di first place wey Tinubu land.
Onanuga yan say even though na vacation, Oga Presido no go completely rest, as e still go dey handle some government work while e dey overseas. After di break finish, e go return come Naija make e join di full political movement wey don start ahead of di January 2027 general election.
Political atmosphere don dey hot for everywhere as campaign season don officially open. Since August 19, INEC don give all political parties and dia candidates green light make dem begin rallies, meetings and other campaign waka.
Tinubu wey wan remain for Aso Rock for another four years under APC banner go get serious challenge from opposition camp. Atiku Abubakar dey run under ADC, while Peter Obi and Rabiu Musa Kwankwaso dey carry NDC matter for di presidential race.
Since campaign matter start, fuel subsidy palava, hardship, cost of food, transport wahala and how government economic policies don affect ordinary Nigerians don turn major issue wey politicians dey use seek support from voters.
President Tinubu still stand gidigba for im policies, especially di removal of fuel subsidy. According to am, di move necessary to put Nigeria economy for correct track and build better future for di country.
Dis vacation come not too long after Vice President Kashim Shettima return from im own leave wey last 12 days. Shettima bin comot from official duty on August 6 before e return office on August 18.
Presidency tok say di Vice President use di period reflect, study and check di progress of government programmes under di Renewed Hope Agenda.
As soon as e resume work, Shettima no waste time before e travel go Luanda for Angola on August 29, where e represent President Tinubu for di 21st Extraordinary Session of di African Union Assembly.
Tinubu expected to land back for Naija after di three-week break as di struggle for 2027 election ticket and votes dey gather more fire across di country.
