Nigerian singer Mr Real, wey im real name be Okafor Uchenna Victor, don accuse im colleague D’banj, wey im real name be Oladapo Daniel Oyebanjo, say e don dey rip am off for years. Dem bin collabo for di song ‘Issa Banger’ for 2018 alongside Slimcase. For post wey Mr Real post for im Instagram page on Friday, December 8, 2023, e yan say D’banj never give am im share of di money wey dem make from di song. E talk say D’banj still promise am SUV as brand ambassador for im CREAM platform but e never fulfill am. Mr Real write: “It has been years of you ripping me @iambangalee. @iambangalee I was used as a brand ambassador to launch your @creamplatform company, tour around and promote the brand for zero naira. @iambangalee the SUV u promised me as the Brand Ambassador of @creamplatform in Conjunction with @Myaccessbank. Till today Tyre I no see. u promised so many things with zero fulfilment. @mtnng @iambangalee I haven’t received my 30% from the revenue off Issabanger of the CRBT product (Caller Ring Back Tone). Let’s stop here for now.”
In another post on Saturday, December 9, 2023, Mr Real share video of himself and D’banj dey dance for one event. For dis post, Mr Real yan say, “This day, I thought I was made for life.” E explain how di money wey D’banj allegedly dey owe am don make am lose friends because some of dem think say e stingy.
