President Tinubu don direct the Ministry of Agriculture and Food Security to quickly release about 42,000 metric tons of maize, millet, and other goods wey dey for strategic reserves.

After one meeting of the Presidential Committee on Emergency Food Intervention for Abuja, the Minister of Information and National Orientation, Mohammed Idris, talk say dis na part of the efforts to reduce the cost of food wey dey rise for Nigeria.

The government also don get the commitment of the Rice Millers Association of Nigeria to release about 60,000 metric tons of rice into the markets.

Our Correspondent talk say the Minister still talk say the federal government wan start to tackle people wey dey hoard food items for their shops, and dem dey look into the option of bringing in grains from outside “if e dey absolutely necessary, as one temporary measure.”

Him still add say the Ministry of Agriculture and food security go join hand with farmers to do big investment for Agriculture to make sure say we get enough food for the country.