Former Kano State Governor and 2027 NDC Vice-Presidential candidate, Rabiu Musa Kwankwaso, don clear air on top why him join hand with Peter Obi for 2027 presidential race, as him also fire heavy shots at former Governor Abdullahi Ganduje, Ibrahim Shekarau and current Kano Governor Abba Yusuf.
According to Kwankwaso, the Obi alliance no be because of personal ambition, but because Nigeria need balance, fairness and fresh democratic change.
Kwankwaso talk say after the failed attempt to work together in 2023, the last four years give am chance to know Peter Obi better.
According to am, wetin him see convince am say Obi na person wey get capacity, credibility and genuine love for ordinary Nigerians.
Him explain say after consultation with Kwankwasiyya Movement, NNPP supporters and Obidient Movement, everybody agree say Nigeria need ticket wey fit unite North and South.
Kwankwaso boast say no political ticket for 2027 fit match the Obi-Kwankwaso combination.
According to am, the alliance get credibility, competence, experience and compassion for suffering Nigerians.
The former Defence Minister say worsening insecurity, hardship, falling agriculture and bad infrastructure push am to support the alliance. Him add say apart from Lagos and few places, infrastructure across Nigeria don nearly collapse.
Some critics don question why Kwankwaso agree become running mate despite serving before as governor, minister, senator and deputy speaker. But the Kano political heavyweight say becoming Vice President no be demotion.
Kwankwaso insist say public office na service to the people and no be competition of title. According to am, whether na councillor, chairman, governor, vice-president or president, the most important thing na to serve.
Kwankwaso reveal say part of the understanding between him and Obi be say the South go hold presidency for one term before power return to the North.
He say the arrangement help reassure northern supporters and strengthen trust within the alliance.
The former governor express confidence say Obi go honour the agreement and no go treat vice-president like “spare tyre”.
Kwankwaso use the interview attack politicians wey leave his political family, saying anybody wey rise through betrayal always end up for political wilderness.
The strongest attack come land for former Kano Governor Abdullahi Ganduje.
Kwankwaso remind Nigerians say Ganduje serve as his deputy for eight years before becoming governor.
According to am, Ganduje political problems start the day him decide to fight the political structure wey bring am to power. He claim say Ganduje for still command serious respect across Kano if him remain loyal to the movement.
Kwankwaso no spare current Kano Governor Abba Yusuf. According to him, members of Kwankwasiyya work day and night to install Yusuf as governor because dem no want another Ganduje experience.
Kwankwaso allege say Yusuf now dey struggle to position himself as Kano’s biggest political figure and dey distance himself from the movement wey carry am enter Government House.
Kwankwaso even reveal one conversation wey him get with President Bola Tinubu. According to am, Tinubu once advise am to settle political differences with Ganduje.
But Kwankwaso sharp remind Tinubu say politics na turn-by-turn matter. Him tell the President say plenty people wey once dey follow am waka shoulder-to-shoulder and dey among him strongest political lieutenants, today no dey close to power again.
To make him point clear, Kwankwaso call names like former Lagos Deputy Governor Kofoworola Bucknor-Akerele and former Governor Akinwunmi Ambode, talk say many people wey once dey inside Tinubu political camp and dey call shots before, don quietly disappear from frontline politics.
As political camps dey begin arrange themselves ahead of 2027, Kwankwaso sound confident say the Obi-Kwankwaso alliance fit shake the country’s political structure.
But him harsh verdict on Ganduje, Yusuf and other former allies don already spark fresh political fire for Kano.
One thing clear be say — Kwankwaso don throw political bomb, and the shockwave fit continue to shake Kano and national politics for a long time.
