Galatasaray don make €4.2 million from di special Victor Osimhen collector box wey dem launch. Dem sell 20,000 boxes within few days, and each one cost 9,999 Turkish Lira.

Di Turkish champions use dia own money produce and pre-sell di boxes, as dem wan tap into di craze wey dey surround di 26-year-old Naija striker wey just sign permanent deal from Napoli for €75 million.

Di money wey dem make na about 200 million Turkish Lira, and all di profit go straight enter Galatasaray pocket through dia GS Store.

Di box na to celebrate Osimhen second waka come Galatasaray, where e go dey collect €20 million salary every year. Inside each box, you go see One special jersey wey get serial number and unique design wey you no fit see anywhere else, One Osimhen mask wey dem make from elastomer material, e get adjustable strap and five stars for front, One scarf wey carry ‘Solo Il Gala’ design.

Di jersey wey dey inside di Osimhen box get QR code for di tag, and once person scan am, e go unlock special digital content, surprise messages, and platform wey dey document di big moment for Osimhen and Galatasaray history.

Dis new sales figure show say Galatasaray merchandising plan dey move fast. Dem first release 100,000 of di special collection for August, and if all sell finish, dem fit make €21.5 million.

Di collection na strictly for Osimhen Galatasaray career, and e fit even help pay him €15 million per season salary. Inside di box, fans go also see personal message from Osimhen wey talk: “This jersey in the box is not my jersey, it is all of ours. Every time you wear it, remember our history, remember us.”

Galatasaray dey depend on strong merchandise sales, matchday money, and sponsorship to balance dia books after di record investment. Last season, dem make €85 million from shirt sales, and dem dey expect total commercial revenue to reach €150 million, wey big pass di €18 million wey domestic broadcast rights dey bring.

Galatasaray president Dursun Özbek talk for press conference say: “The fans are our biggest investors. We call on them again to fill the stadium and support this team. Every Osimhen box purchased is a contribution to writing history.”

Last season, when Osimhen dey on loan with Galatasaray, e score 37 goals and give 8 assists inside 41 matches, and na so e take become fans favourite before e sign permanent deal.