Na serious kasala don burst for Abuja and Osun as President Bola Tinubu suddenly pull handbrake on top EFCC matter, order make dem free Osun State account wey anti-graft agency lock because of alleged N11 billion wahala.
The move don set political fire everywhere as opposition parties, lawyers, activists and ordinary Nigerians begin ask whether EFCC truly dey work on dia own or whether na Aso Rock remote control dey direct dem.
The whole gbege start when EFCC carry letter go First Bank, order dem make dem block one Osun State allocation account and make no kobo commot from there pending investigation into alleged diversion of public funds.
Before anybody fit say Jack Robinson, Osun Government raise alarm, accuse EFCC of trying to cripple government operations just few days before governorship election.
As the shouting dey increase, Tinubu come enter the matter himself and order EFCC make dem waka go court, remove the restriction and stop every action wey fit create political suspicion before the August 15 election.
The President talk say although EFCC get power to investigate corruption matter, the timing no get sense because e fit make people believe say Federal Government dey use anti-corruption agencies play election football
Immediately Tinubu reverse the decision, social media burst like transformer wey NEPA overload.
Thousands of Nigerians begin rain heavy knocks on EFCC chairman, Ola Olukoyede, as many accuse am of turning the commission into political attack dog.
Some angry Nigerians talk say if Tinubu truly no know about the action before, then Olukoyede don disgrace both EFCC and Presidency.
Meanwhile, Osun Government no gree fold hand. Dem sharply drag EFCC enter Federal High Court, demand make court cancel the account freeze and force the commission pay N2 billion damages.
Governor Ademola Adeleke camp insist say the whole thing na political setup designed to scatter state activities and stop government from carrying out promises to workers before election.
Dem even accuse former governor and APC big man, Gboyega Oyetola, of standing somewhere behind the curtain and pulling strings.
EFCC however no gree back down completely.
The commission stand gidigba say na suspicious movement of money trigger the action and say dem only follow powers wey law give dem.
According to EFCC, no be all Osun accounts dem freeze. Na only one account wey raise red flag during investigation. But opposition parties no buy that explanation.
ADC and Atiku Abubakar camp come attack the Presidency from another angle.
According to dem, Tinubu statement accidentally expose wetin government don dey deny for years — that anti-corruption agencies no really free from presidential influence.
ADC talk say if President fit order EFCC to stop court matter today, then Nigerians deserve answer about who truly dey control the agency.
Former Vice President Atiku Abubakar come add pepper for the soup.
According to am, freezing a state’s major account days before election fit paralyse governance, delay salaries, affect public services and create fear among voters.
People say the controversy don stain the image of the commission and reduce public trust in the anti-corruption war.
Some even claim say under Olukoyede, EFCC don spend more time fighting political battles than chasing corrupt politicians.
While politicians dey exchange fire, lawyers and civil society groups come with different opinions.
Some legal experts hail Tinubu, saying e save Nigeria from another election controversy.
Others argue say EFCC fit continue investigation but suppose avoid any move wey go make Nigerians suspect political manipulation.
As Osun election dey draw closer, the matter don become more than corruption investigation.
E don turn battle about power, politics, democracy and who truly hold the steering for Nigeria anti-corruption agencies.
For now, court don enter the matter, EFCC dey defend itself, politicians dey throw accusations up and down, while Nigerians dey watch the drama like cinema film wey never reach final episode.
