Senegal don talk say dem dey ready to send soldiers enter Niger if di ECOWAS regional bloc decide say make dem do am. Di Foreign Minister of Senegal, Aissata Tall Sall, yan dis one as e take answer reporters, and e talk say too many coups don happen for di region.

For anoda tori, di Chairman of di ECOWAS Authority of Heads of State and Government, President Bola Ahmed Tinubu, don send people go Niger Republic with clear order to quick quick settle di wahala wey dey ground for di country. Dis one dey follow wetin dem agree upon as dem finish di special summit of ECOWAS wey dem hold last weekend for Abuja.

According to wetin di Special Adviser to di President, Ajuri Ngelale, yan for one statement, di delegation wey General Abdulsalami Abubakar (Rtd), wey be former Nigerian Head of State, lead don comot go Niamey on Thursday afta President Tinubu brief dem for State House for Abuja. President Tinubu still send anoda group wey Ambassador Babagana Kingibe lead go engage with di leaders of Libya and Algeria concerning di wahala wey dey Niger. E don give dem order make dem yan well well with everybody wey dey involved for di mata, so dat dem fit make sure dem find better solution wey go settle di matter well well.