Police for Akwa Ibom don gbege six pesin wey dem dey suspect say na dem dey run armed robbery, tiff okada and oda bad-bad work for Ikono, Ini and Obot Akara side.
Dem grab dem for early morning Wednesday as police tactical squad enter different hideout wey bad boys dey use siddon. Police tok say na long investigation and secret information wey dem gather make dem fit trace di remaining members of one robbery wey don dey disturb pipo for di area.
Among di pesin dem wey police carry na Peter Sabbath, Joseph Udo and Victor Igwe. Police allege say Victor na im dey arrange fake paper and fake receipt wey dem dey use sell okada and property wey dem tiff.
Other pesin dem wey police hold na Boniface Essiet, Simeon Udo and Uko Akang. Police tok say Boniface na baba wey dey prepare juju, agbara and oda nkan for di gang, while dem catch Uko Akang with one red Qlink okada wey police believe say na tiff property.
As police search di suspects and dia hideout, dem recover two dane gun, three laptop, one okada wey dem suspect say na tiff property, plenty juju things and oda evidence wey fit help investigation.
Police tok say operation no be only to catch di suspects, but to scatter di whole robbery ring wey dey operate for di three council area. Dem still dey dig deeper to know wetin each suspect do and how far dia hand reach for di criminal network.
Commissioner of Police for Akwa Ibom, Baba Mohammed Azare, praise di officers wey carry out di operation. Im salute dia courage and sharp work, come order say make investigation continue well-well so dem fit recover more property wey dem tiff and catch oda gang members wey still dey run.
Di police oga still vow say command no go gree give bad boys resting place for Akwa Ibom. Im tok say dem go continue to use better information and sharp strategy pursue criminal elements until dem clear dem comot for di state.
