Passenger plane wey carry nearly 50 people don crash for Russia far east Amur region yesterday. Authorities talk say everybody wey dey inside don die.
Di aircraft na Soviet-made Antonov-24 wey get twin propeller. E crash enter thick forest area, and smoke begin rise from di crash site. State media and video wey investigators release show say nobody survive.
Angara Airlines flight dey go Tynda from Blagoveshchensk when e waka comot from radar around 1:00 p.m. local time (0400 GMT).
Rescue helicopter later see di plane body wey dey burn for forest mountain slope about 15 kilometres south of Tynda airport. Di video wey investigators release show big smoke dey rise from di crash place, and pieces of di plane scatter for ground.
Search and rescue team reach di hard-to-enter place some hours after di crash, but dem no see anybody wey survive, na wetin state news agency TASS talk.
Investigators never talk wetin cause di crash.
Di weather no good that time, na wetin Angara Airlines CEO Sergei Salamanov yarn give Russia REN TV. E tok say: ‘Na di commander decide say make dem still fly.’Tynda na small town wey get about 30,000 people. E dey inside thick taiga forest, about 200 kilometres from Chinese border.
