Di National Assembly don gree officially say every June 12 go be di day wey President of Nigeria go dey address joint session of di legislature.

For di joint sitting, Senate President Godswill Akpabio announce di decision after Speaker of di House of Reps, Tajudeen Abbas, raise one motion.

Before di motion, Senator Akpabio, as e dey give him opening talk, salute all di people wey fight and suffer for Nigeria democracy. E talk say June 12, 1993 get strong meaning, and mention how people like President Tinubu show courage for that time. E still suggest make dem build June 12 Museum to keep di memory of Nigeria democratic struggle.

Akpabio talk say e important make Executive and Legislature dey work together well well, so progress go dey for di country.

Our tori person Raliat Adenekan report say Speaker Abbas for him own speech talk say National Assembly don check 2,263 bills, pass 186 bills, and President don sign 51 of dem into law inside two years.

Di Speaker also talk about wetin dem go focus on for future — like quick-quick constitutional amendment, better use of renewable energy, develop solid minerals, and make President’s yearly address to NASS become official tradition.