kano State Governor, Abba Kabir Yusuf, don cut cap for Federal Government after dem decide say dem no go continue with the planned increase for NECO examination fee for now.

According to the governor, na decision wey bring relief come for millions of parents and students across Nigeria, especially when many families still dey struggle to balance house expenses with school bills.

Yusuf yarn say plenty parents don already dey manage high cost of foodstuff, transport fare, rent with other daily needs. If government for still add higher NECO fee join the matter, e for make life harder for many families wey dey struggle to train their children.

The governor say education no be something wey only children from rich homes suppose enjoy.

“Every pikin deserve chance to go school and write exam without money becoming obstacle for future,”naso he talk.

Governor Yusuf explain say education na one of the strongest weapons to fight poverty, ignorance and unemployment.

According to am, when school fees and examination charges continue to dey rise, na children from poor homes dey suffer pass because some of them fit drop out or fail to continue to dey go school.

Minister Of Education Get Praise Too

The Kano governor no stop there. He also hail the Minister of Education, Dr. Tunji Alausa, for im commitment towards making education available to every Nigerian child regardless of background.

Yusuf talk say policies wey support affordable education fit help reduce the number of out-of-school children and improve literacy levels across the country.

He praise the Universal Basic Education Commission (UBEC) for the role wey dem dey play in supporting schools and education programmes nationwide.

Governor Yusuf reveal say the timely release of UBEC counterpart funds don help Kano State carry out several projects wey benefit schools and students.

According to am, the funds don make am possible for government to:

• Build new classrooms
• Renovate old and damaged school buildings
• Improve learning environments
• Provide better facilities for pupils and teachers
• Expand access to basic education across different communities

He say many schools wey suffer neglect before don begin receive attention because of the funds.

Parents And Students Welcome Development

For many parents and students, the suspension of the NECO fee increase na welcome relief.

Some parents believe say the decision go reduce the financial pressure wey dem already dey face, especially those wey get more than one child preparing for external examinations.

Education stakeholders also argue say keeping examination fees affordable go encourage more students to stay for school and finish their education instead of dropping out because of financial challenges.

For now, Kano State Government believe say the suspension of the NECO fee hike na step in the right direction and sign say the voices of parents, students and education stakeholders still matter.