JAMB don announce say dem go withdraw Miss Ejikeme Mmesoma actual result and ban am from writing dia examination for the next three years.

For one statement, Joint Admissions and Matriculation Board (JAMB) Acting Director, Dr Fabian Benjamin, yan say di result wey di 19-year old dey show na fake.

Miss Mmesoma, wey be student for Anglican Girls Secondary School for Uruagu, Nnewi, for one video wey go viral, talk say she no manipulate her result and say na possible technical problem from JAMB system cause am.

But JAMB Registrar, Prof. Ishaq Oloyede, for one separate interview, yan say JAMB don conclude investigation on Miss Mmesoma matter and dem get internal evidence wey show say di change for her scores happen with her involvement. Dem talk say di features wey concern her, na only she fit know dem, so e no possible say her scores increase without her knowledge.