Dangote Petroleum Refinery and Petrochemicals don extend di deadline for people wey wan buy shares for di company by two weeks, as interest from investors across Africa continue to increase.

Di new deadline na Tuesday, October 27, 2026, instead of October 13, after Securities and Exchange Commission (SEC) approve di extension.

President and Chief Executive of Dangote Industries Limited, Aliko Dangote, announce dis one when delegation of Kenyan lawmakers visit Dangote Refinery for Lagos.

Dangote yarn say people wey wan buy di shares don already show interest wey pass di amount of money wey di company originally plan to raise.

E talk say di main reason for extending di deadline no be because dem still need more money, but to give more Africans chance to own shares for di refinery.

According to am, di number of people wey wan take part for di share sale matter pass di amount of money wey dem plan to gather.

Dangote also yarn say discussions with Nairobi Securities Exchange don help di company find ways to make am easier for investors from Kenya and other African countries to take part for di offer. Di company dey work to make similar arrangements for other African markets, subject to di rules wey apply for each country.

Di refinery don put 4.1 billion ordinary shares up for sale at ₦525 per share. Di offer, wey open on September 14, worth about ₦2.15 trillion.

Di company talk say di extension follow strong interest from eligible investors across Africa and oda places. Dem also dey work to make di share sale easier for people outside Nigeria through more sales channels and programmes wey fit help investors from different countries take part.i extra two weeks go give interested investors more time to open accounts, confirm their identity and complete other requirements wey dem need before dem fit buy di shares.

Managing Director and Chief Executive Officer of Dangote Petroleum Refinery and Petrochemicals, David Bird, welcome di approval from SEC, saying di extension go give more investors across Africa opportunity to take part.

Bird explain say di company plan from di beginning na to allow as many people as possible own part of di business and benefit from di refinery future growth.

E add say di extra time go help di company reach more investors across Africa and give dem opportunity to become shareholders.