Hakeem Baba-Ahmed don talk say President Bola Tinubu suppose don personally come out talk say di rumour wey dey fly up and down say he wan drop Vice President Kashim Shettima no get any truth inside am.

He talk say, “I go really like know wetin dey cause all dis tori about dropping Shettima. To talk true, I feel say di President suppose don do something since.”

He add say, “If all dis tori about dropping di Vice President for another person, maybe another Northern VP, maybe Christian, maybe from another region no get any truth, e for just take one thing: make di President come out direct and talk say, ‘Make una stop dis nonsense. I get confidence in my Vice President, I dey work well with am, I dey happy with am, and I no wan hear dis nonsense again about me dropping am now or later.’

‘I go choose who go be my running mate for 2027 when dat time reach. For now, we get work to do.’ But he no talk am. Even his people no talk am.”

Baba-Ahmed come conclude say, “E dey worry me, make I just talk say e dey worry. If wetin I talk na wetin di President dey think, he suppose don talk am. If he no fit talk am like I talk, he suppose find way talk am; but e suppose come from am direct and e must strong well.”